Францын шигшээ багийн ахлагч, “Реал Мадрид” клубийн довтлогч Килиан Мбаппе Хятадын удирдагч асан Мао Зэдуныг “дарангуйлагч” хэмээн нэрлэсэн бичлэг цахим орчинд тарсны дараа Хятадын гурван компани түүнтэй байгуулсан хамтын ажиллагаагаа цуцалжээ. Үүний дараа Мбаппе уучлал хүсэж, Хятадын ард түмэн болон тус улсын түүхийг хүндэтгэдгээ илэрхийлсэн байна.

Хэрэг явдал аравдугаар сарын 26-нд Францын хөлбөмбөгийн подкаст “The Bridge”-ийн бичлэг цахим орчинд тарснаар эхэлжээ. Уг бичлэгт Мбаппегаас өөрийнх нь тухай хамгийн хөгжилтэй мемийг нэрлэхийг хүсэхэд тэрбээр нүүр царайг нь Хятадын дарангуйлагчийн зураг дээр байрлуулсан мем хэмээн дурдсан байна.

Хятадын ундаа үйлдвэрлэгч “Дунпэн”, сүүн бүтээгдэхүүний томоохон үйлдвэрлэгч “Мэнниү”, мөн “Милкграунд” компани аравдугаар сарын 27-нд Мбаппетэй байгуулсан хамтын ажиллагаагаа цуцалснаа мэдэгджээ. Эдгээр компани үндэсний хэмжээний талаар хөндсөн аливаа үйлдлийг хүлээн зөвшөөрөхгүй гэдгээ мэдэгдсэн байна.

Хятадад 1949–1976 онд удирдагч байсан Мао Зэдуны тухай егөөдөл, хошигнол нь эмзэг сэдэвт тооцогддог. Тиймээс Мбаппегийн хэлсэн үг хятадын цахим орчинд хүчтэй шүүмжлэл дагуулж, түүний сурталчилгааны гэрээнүүдэд шууд нөлөөлжээ.

Мөн Хятадын төрийн телевизийн “China Media Group” Испанийн Ла Лигийн тоглолтууд болон Мбаппетэй холбоотой нэвтрүүлгүүдийн дамжуулалтыг зогсоож, түүний оролцсон сурталчилгааг хассан байна. Ла Лигийн ерөнхийлөгч Хавьер Тебас Хятадын хөгжөөн дэмжигчдээс уучлал хүсэж, цаашид ийм нөхцөл байдал үүсэхээс сэргийлэхийн тулд тусгай зохицуулалт боловсруулахаа мэдэгджээ.