Улсын харцага Г.Ганхуяг болон баавгайд бариулсан хохирогчийн ар гэрийнхэн мэдээлэл хийж, нөхцөл байдлын талаар мэдээлэл өглөө.
2026 оны аравдугаар сарын 7-ноос 8-нд шилжих шөнө нийслэлийн Баянзүрх дүүргийн 35 дугаар хороо, Улиастайн Бурхантын аманд баавгай айлын гэр рүү дайрч, 40 настай эрэгтэй баавгайд бариулан амь насаа алдсан харамсалтай хэрэг гарсан. Хамт байсан 55 настай эмэгтэйн нүүрэн хэсэг баавгайд самардуулж, хүнд гэмтсэн бөгөөд гэрээс зугтаж, хөрш айлдаа хүрснээр амьд үлдсэн.
Хохирогч эмэгтэй ГССҮТ-д эмчилгээ хийлгэж байгаа бөгөөд дотооддоо бүрэн эмчлүүлэх боломжтой юм. Гэмтлийн хувьд толгойн хэсэгтээ том хэмжээний хуулагдсан шархтай, цөмрөгт цууралттай, эрүү нь хугарсан, мөр нь хүнд гэмтсэн, цээж, хэвлийн хэсэгт дарагдаж шахагдсан зовиуртай байна.
Улсын харцага Г.Ганхуяг “Би өөрөө анчидтай ойрхон, ан гөрөө сонирхдог хүн учраас баавгайн талаарх мэдээллийг хүргэе гэж бодсон. Баавгай ойрын 10 км радиусыг өөрийн эзэмшил хэмээн үздэг учир хүч чадалтай баавгай ой модонд үлдэж, газар нутаггүй, идэш тэжээлгүй болсон баавгайнууд суурьшлын бүсэд орж ирж байна хэмээн таамаглаж буй. Баавгайг мэдэхгүй хүмүүс бамбарууш мэт хайрлаж, өрөвдөж байна. Энэ зэрлэг, аймшигтай амьтнаас иргэдээ хамгаалж, агнах хэрэгтэй. Анчдад ойн гүнд байгаа бусад баавгайг хөөгөөд байгаа тэр эр баавгайг агнах зөвшөөрөл өгөөч” гэлээ.
