Ерөнхийлөгчийн Хэвлэл мэдээллийн албаны дарга Ц.Ганзориг сэтгүүлч Т.Шинэбаярыг нэр бүхий хүмүүст Хөдөлмөрийн баатар цол олгуулах, редакц байгуулахад зориулж их хэмжээний мөнгө өгөхийг шаардан шантаажилсан хэмээн мэдээлэл хийсэн. Харин өнөөдөр сэтгүүлч Т.Шинэбаяр уг мэдээллийг няцааж, өөрийг нь илт гүтгэж байна хэмээн мэдээлэл өгсөн юм.

Тэрээр “Цагдаагийн ерөнхий газраас намайг дуудаагүй. Гэхдээ өчигдөр Ерөнхийлөгчийн Тамгын газраас миний эсрэг гомдол гаргасан гэж сонссон учраас би өөрийн биеэр сайн дураараа ирж шалгуулах гэсэн юм. Шатахуун авах гээд оочирлож байсан ч шатахуун өгөхгүй байсан учраас энд ирлээ.

Өчигдөр Ерөнхийлөгчийн Тамгын газрын Хэвлэл мэдээлэл, олон нийттэй харилцах албаны дарга Ц.Ганзоригийн өгсөн мэдээллийг харсан. Тэр хүн намайг таван асуудлаар илт гүтгэж байна лээ. Өчигдрийг хүртэл би Ц.Ганзориг болон Ерөнхийлөгчийн хэвлэл мэдээллийн албаны даргаар ажиллаж байсан Золоо гэдэг хүнтэй найз нөхдийн харилцаатай байсан. Энэ хүрээнд Ц.Ганзоригтой Нагомид нэг удаа хамт хоол идэж, мөн viber-аар нэг удаа ярьж байсан. Хамт хоол идэх үеэрээ надаас олон зүйл асуусан. Би ч танилын хувьд асуусан зүйлд нь хариулж байсан.

Намайг шантааж хийсэн гэж буруутгаж байгаа таван асуудлын нэг нь одон. Хөдөлмөрийн баатар цолтой холбоотой асуудал юм. Монгол Улсын хэмжээнд сум, орон нутагт ажиллаж амьдарч байгаа Монгол Улсын гавьяат ардын эмч ганцхан байдаг. Тэр хүн бол миний өсөж төрсөн нутаг болох Говь-Алтай аймгийн Тонхил суманд ажиллаж, амьдардаг эмч. Тэрээр Говь-Алтай аймгийн 50 мянган иргэний эрүүл мэндийг 50 жилийн турш хамгаалж, эмчилж ирсэн хүн юм. Энэ эмч дөрвөн жилийн өмнө Ерөнхийлөгчийн Тамгын газарт Хөдөлмөрийн баатар цол олгуулах хүсэлтээ хүргүүлсэн боловч одоог хүртэл ямар нэгэн хариу аваагүй юм байна. Тийм болохоор нутгийн дүүгийн хувьд зүгээр л Ц.Ганзоригоос тодруулж асуусан юм.