Юбикаб Холдинг компани олон улсын IDCXS стандартыг хангаж, батламжаа өнөөдөр гардан авлаа. Тус компани энэхүү стандартыг үйл ажиллагаандаа нэвтрүүлэх бэлтгэл ажлыг хоёр жилийн өмнөөс эхлүүлж, сүүлийн зургаан сарын хугацаанд дотоод үйл ажиллагаандаа үе шаттай хэрэгжүүлсэн байна.

Стандартыг хэрэгжүүлэх хүрээнд Юбикаб компанийн үйл ажиллагааг долоон бүлгийн нийт 356 шалгуур үзүүлэлтээр үнэлж, аудит хийжээ. Үүний үр дүнд тус компани нийт шалгуурын 92.5 хувийг хангаж, excellence буюу өндөр түвшний үнэлгээ авсан байна. Олон улсын стандартыг нэвтрүүлэх үйл явц нь компанийн дотоод үйл ажиллагааг зөвхөн нэг түвшинд үнэлэхээс гадна өмнө нь анзаараагүй, сайжруулах шаардлагатай чиглэлүүдээ тодорхойлох боломж олгосон байна. Түүнчлэн, хэрэглэгчийн дуу хоолойг үйл ажиллагаандаа тусгаж, үйлчилгээний чанар, хүртээмж, аюулгүй байдлыг сайжруулахад анхаарч ажиллажээ.

Тухайлбал, Юбикаб компани үйлчилгээ үзүүлж байгаа жолооч нарыг бүртгэх, баталгаажуулах үйл явцыг сайжруулж, зөвхөн мэдээллийг хурдан шалгах бус тухайн хүн өмнө нь хэрэг, зөрчилд холбогдож байсан эсэхэд давхар хяналт тавих тогтолцоог боловсронгуй болгосон байна. Ялангуяа эрүүгийн хариуцлага хүлээсэн, 13 төрлийн тодорхой гэмт хэрэгт холбогдож байсан хүмүүсийг үйлчилгээний системд бүртгэхгүй байх зэрэг аюулгүй байдлын нэмэлт шалгуурыг нэвтрүүлжээ. Олон улсын стандартыг хэрэгжүүлэх явцад хэрэглэгчийн тав тух, аюулгүй байдлыг хангахтай холбоотой олон шинэчлэл, сайжруулалтыг дотоод үйл ажиллагаандаа нэвтрүүлсэн байна. Мөн тус компани үйлчилгээний стандартыг зөвхөн Улаанбаатар хотод бус Монгол Улсын 21 аймагт ижил түвшинд мөрдөж ажиллахыг зорьж байгаа юм. Өөрөөр хэлбэл, орон нутаг болон нийслэлд үзүүлж буй үйлчилгээний чанар, аюулгүй байдлыг нэг стандартын хүрээнд хангах зарчим баримталж байна.