Нийслэлийн Сонгинохайрхан нэгдсэн эмнэлэгт хагалгаанд орох зарим өвчтөнд хэрэглэдэг унтуулгын эм, тариа тасарсны улмаас төлөвлөгөөт хагалгааг түр хойшлуулсан талаар тус эмнэлгийн эмч мэдээлсэн юм. Тодруулбал, хагалгааны үед мэдээ алдуулалт болон өвдөлт намдаах зорилгоор хэрэглэдэг “Фентанил” тарианы нөөц дууссан тул яаралтай бус, төлөвлөгөөт хагалгааг хийх боломжгүй болсон байна.

Энэ талаар тус эмнэлгийн эмч “Улс, аймгийн III шатлалын эмнэлгүүд “Фентанил”-ын нөөцгүй болсон тул хагалгаагаа хойшлуулж байна. Харин гэнэтийн, яаралтай, амь насанд нь аюул учирсан өвчтөнүүдэд байгаа нөөц тариагаа ашиглан хагалгаа хийж байгаа. Бусад өвчтөнд “Фентанил” тариагаа олвол хагалгааг товлож болно гэж хэлж байгаа” хэмээн мэдээлсэн юм.

Харин уг мэдээллийг Эрүүл мэндийн яамнаас тодруулахад, өнөөдрийн байдлаар улсын хэмжээнд 23 эмнэлгийн байгууллагад “Фентанил” тариа хэвийн нийлүүлэгдэж, шаардлагатай нөөцтэй байгаа талаар мэдээллээ. Эрүүл мэндийн яамны мэдээлснээр эмнэлгийн байгууллагуудад шаардлагатай эм, эмнэлгийн хэрэгслийг худалдан авах төсвийг олгосон бөгөөд эмнэлгүүд өөрсдөө эм, эмнэлгийн хэрэгслийн ханган нийлүүлэгч байгууллагаас шаардлагатай эм, тариагаа худалдан авдаг байна.

Тиймээс Сонгинохайрхан нэгдсэн эмнэлэгт “Фентанил” тариа тасарч, төлөвлөгөөт хагалгаа хийх боломжгүй болсон нь улсын хэмжээнд “Фентанил” тасарсантай холбоотой биш, харин тус эмнэлэг эм ханган нийлүүлэгч байгууллагад өр төлбөртэй байгаатай холбоотой гэж Эрүүл мэндийн яамнаас тайлбарлав. Иймд тус эмнэлэг эм ханган нийлүүлэгч байгууллагатай холбоотой өр төлбөрийн асуудлаа шийдвэрлэж, шаардлагатай эм, тарианы нөөцийг бүрдүүлэх арга хэмжээ авах шаардлагатай гэсэн юм.