Улсын хэмжээнд элсэлтийн шалгалтыг 2026 оны зургаадугаар сарын 25-28-нд зохион байгуулсантай холбогдуулан Боловсролын яамнаас мэдээлэл өглөө. 

Боловсролын яамны Ерөнхий боловсролын бодлого зохицуулалтын газрын дарга Л.Ганбатын мэдээлснээр,  "Энэ жилийн Элсэлтийн ерөнхий шалгалт ямар нэгэн ноцтой зөрчилгүйгээр харьцангуй тайван, хэвийн зохион байгуулж дууслаа. Хичээл тус бүрийн ирцийн мэдээллээс харахад хамгийн өндөр ирцтэй хичээл нь Нийгэм судлал байсан бол хамгийн бага ирцтэй нь орос хэл байлаа.

Энэ жил элсэлтийн ерөнхий шалгалтын 10 хичээлээр 194 шалгуулагч 800 оноо авсан нь өмнөх онуудтай харьцуулахад хамгийн өндөр үзүүлэлт болж байна. Өнгөрсөн онд 163 шалгуулагч 800 оноо авч байсан бол энэ жил 31-ээр нэмэгдлээ. Хичээл тус бүрээр авч үзвэл математик 43, монгол хэлэн 25, нийгэм судлал 47, англи хэлэн 36, орос хэлэн 5, газар зүй 2, физик 14, биологи 10, хими 10, түүхийн хичээлээр 2 шалгуулагч 800 оноо авсан байна. Мөн олон улсын шалгалтын үнэлгээг элсэлтийн ерөнхий шалгалтын үнэлгээтэй 6032 шалгуулагч дүйцүүлжээ.

Шалгуулагчид энэ долоо хоногийн ажлын таван өдрийн дотор өөрсдийн авсан дүн, оноотой санал нийлэхгүй тохиолдолд хүсэлт гарган, хийж гүйцэтгэсэн эх материалтайгаа танилцаж, дүнгээ тулгах боломжтой.

Энэ жил өмнөх онуудтай харьцуулахад гар утас авч орсон зөрчил хамгийн өндөр бүртгэгдсэн. 22 шалгуулагч гар утастай шалгалтын танхимд орсны улмаас дүн, оноогоо хүчингүй болгуулсан.

Өвлийн элсэлтийн ерөнхий шалгалтыг арванхоёрдугаар сард зохион байгуулах бөгөөд арваннэгдүгээр сард монгол хэл, бичгийн шалгалтыг дахин авна" гэлээ.