МАН-ын дарга нар яг одоо УИХ-ын дарга Н.Учралын өрөөнд хуралдаж байна.

Хуралд Ерөнхий сайд Г.Занданшатар, МАН-ын Ерөнхий нарийн бичгийн дарга Я.Содбаатар, УИХ дахь МАН-ын бүлгийн дарга Ж.Батжаргал болон холбогдох хүмүүс оролцож үүсээд байгаа нөхцөл байдлын талаар ярилцаж байгаа аж.

УИХ дахь АН-ын бүлэг өнөөдөр хуралдаж, УИХ-ын дарга Н.Учралыг УИХ-ын даргын ажлаа өгтөл чуулганы хуралдаанд суухгүй гэж мэдэгдсэн. Энэ нь МАН-ын дарга Н.Учрал УИХ-ын даргын ажлаа өгч Ерөнхий сайд болох улс төрийн эхлэл хэмээн улс төрийн хүрээнд ярьж байна.

Мөн Л.Оюун-Эрдэнэ, Д.Амарбаясгалангийн талаас Н.Учралыг Ерөнхий сайд болгож, өөрсдөө УИХ-ын даргаа авах тохироо хийх гэж оролдож байна. Хэрвээ тохиролцоонд хүрвэл С.Амарсайханыг УИХ-ын даргаар томилуулна гэсэн мэдээлэл ч байгаа юм. Гэхдээ Ерөнхий сайд Г.Занданшатар тоглоомын гадна үлдэхгүй л болов уу.

Ямартаа ч яг одоо болж буй МАН-ын дарга нарын хурлаар тодорхой шийдвэр гаргах аж.