Сургууль, цэцэрлэгийн багш нарын ажил хаялт 7 дахь өдрөө үргэлжилж байна. Өнөөдрийн байдлаар улсын хэмжээний сургуулийн 30, нийслэлийн 60 хувь нь ажил хаясан бол улсын цэцэрлэгийн 80 гаруй хувь нь ажил хаялтад нэгдээд байгааг Боловсролын сайд П.Наранбаяр хэлсэн.

Хамгийн сүүлд буюу энэ сарын 22-нд Сангийн сайд Б.Жавхлан, Боловсролын сайд П.Наранбаяр, Гэр бүл хөдөлмөр нийгмийн хамгааллын сайд Т.Аубакер нар Монголын багш нарын үйлдвэрчний эвлэлийн төлөөлөлтэй уулзсан ч нэгдсэн байр сууринд хүрч чадаагүй, ажил хаялт үргэлжилж байгаа.

Тус уулзалтаар Засгийн газар ирэх оны нэгдүгээр сарын 1-ээс багш нарын үндсэн цалинг 20, долдугаар сарын 1-ээс 10 хувиар нэмэгдүүлэх саналаа хэлсэн. Ингэхдээ төсвийн ерөнхийлөн захирагч нарын нийт урсгал зардлаас 10 хувийг танаж, багш, эмч нарын цалингийн нэмэгдлийн эх үүсвэрийг гаргаж 20 хувиар нэмэгдүүлнэ гэдгийг Засгийн газраас мэдэгдэж байгаа. Гэтэл нөгөө талд багш нар цалингаа 3,5 сая төгрөг болгон нэмэгдүүлэх шаардлага тавьж байгаа бөгөөд энэ шаардлагыг нь хүлээж авахгүй бол ажил хаялтаа үргэлжлүүлнэ гэсэн байр суурь илэрхийлээд байгаа юм. Харин өчигдөр Боловсрол шинжлэх ухааны үйлдвэрчний эвлэлийн тэргүүлэгчдийн хурал болжээ. Тус хурлаас хэлэлцээрт орох хүмүүсээ гаргаж өгөх бөгөөд хэлэлцээр үргэлжлэх аж.

Түүнчлэн, ажил хаяж байгаа багш нарын цалинг олгох, эсэх нь тодорхойгүй байгаа бөгөөд салбарын сайдын эрх мэдлээс хэтэрсэн гэдгийг Боловсролын сайд П.Наранбаяр хэлсэн. Учир нь багш нар процесс дуусаагүй үед ажил хаясан нь хүндрэлтэй байдлыг үүсгэсэн байна. Тодруулбал, Арбитрын хэлэлцээр эхлээгүй байх үед ажил хаяж болохгүй гэсэн хуулийн заалттай байдаг аж. Боловсролын сайд П.Наранбаяр хэлэхдээ "Арбитрын хэлэлцээр эхлээгүй байх үед багш нар ажил хаяж эхэлсэн нь энэ ажил хаялт хууль ёсны байж чадах уу, үгүй юү гэдэг асуултыг бий болгож байгаа юм. Арбитрын дүн гараагүй байхад ажил хаялт эхэлчихсэн байдаг. Багш нарын өмнөөс санаа зовж байна. Одоо бол миний мэдлээс хэтэрсэн асуудал болчихсон. Уг нь тухайн үед нь холбооны төлөөлөд бид сануулж байсан. Цаашдаа шүүхээр ажил хаялтын асуудлыг шийдэх ёстой. Ажил хаялтад оролцсон багш нар ямар нэгэн хариуцлага хүлээх ёсгүй" гэсэн юм.

Багш нарын гар дээр авч байгаа цалингийн 50 хувь нь үндсэн цалин бол 50 хувь нь олон төрлийн нэмэгдлүүд байдаг аж. Ажил хаясан багш нар ажил хийж байгаа багш нартайгаа ижил цалингаа бүтнээр нь авах нь ч шударга бус. Тиймээс багш нарын ажил хаялт хуулийн дагуу юу гэдгийг шүүх тогтоох бололтой.