Монголбанк нь 2024 онд зохион байгуулагдсан Дэлхийн алтны зөвлөлийн хурлаар Колумб, Эквадор, Филиппин улсын Төв банкнуудтай хамтран бичил уурхайчдаас алт худалдан авах үйл ажиллагааг албан ёсны болгох, хариуцлагатай бичил уурхайг дэмжих, албан ёсны нийлүүлэлтийн сүлжээнд нэгтгэх зорилготой “Лондоны зарчмууд” багц зарчимд нэгдсэн.

Энэ хүрээнд Монголбанк Швейцарын “Хариуцлагатай Алтны Холбоо” /Swiss Better Gold Association/ болон “Аргор Хераиус” /Argor Heraeus SA/ алт цэвэршүүлэх үйлдвэртэй хамтран ажиллах санамж бичигт гарын үсэг зурлаа. Ингэснээр талууд хамтран жижиг, дунд алт олборлогчид болон бичил уурхайчдын хариуцлагатайгаар олборлосон алтыг олон улсын үнэт эдлэлийн компанид түүхий эдээр нийлүүлэх боломж бүрдэж байна.

Хамтын ажиллагааны хүрээнд Булган аймгийн хэмжээнд үйл ажиллагаа эрхэлж буй жижиг, дунд алт олборлогчид болон бичил уурхай эрхлэгчдийг хамруулан төслийн эхний шатны ажлуудыг гүйцэтгэх ба энэ ажилд Дархан-Уул аймаг дахь Монголбанкны хэлтэс, Стандарт, хэмжил зүйн газрын Үнэт металлын сорьцын хяналтын газрын үнэт металлын сорьц тогтоох лаборатори зэрэг байгууллагууд хамтран ажиллахаар төлөвлөж байна. Монгол Улсын хууль, дүрэм журмын хүрээнд шударгаар олборлосон алтыг олон улсын үнэт эдлэлийн зах зээлд нийлүүлснээр Монгол Улсын алтны олборлолт, нийлүүлэлтийн сүлжээ нь ил тод, найдвартай гэдгийг илэрхийлэхээс гадна алт олборлогч бичил уурхайчдад тушаасан алтных нь кг тутамд урамшуулал олгогдох юм.