“Pew Research”-ийн энэ жилийн судалгаагаар ахлах сургуулийн багш нарын 70 гаруй хувь нь сурагчид хичээлийн үеэр утсаа оролдох нь "гол асуудал" болж байна гэж хариулжээ. Тийм ч учраас муж улсууд сурагчдын гар утасны хэрэглээг зогсоохын тулд хүчин чармайлт гаргаж байгаа аж. Өнгөрсөн жил гэхэд АНУ-ын найман мужид хичээлийн цагаар сурагчдын утасны хэрэглээг хязгаарлах хууль баталсан байна. Гол асуудал нь өсвөр насныхан хичээлийн үеэр “Snap”, “TikTok”, “Instagram” зэрэг платформуудыг ашиглаж өөрсдийгөө болон ангийнхаа хүүхдүүдийн анхаарлыг сарниулж байгаад биш, харин сурагчид утсаа ашиглан үе тэнгийнхнээ дээрэлхэж, бэлгийн мөлжлөгт өртөж, бие махбодод халдсан бичлэгийг хуваалцдагт байгаа аж. Тиймээс сургууль дээр утас хориглохыг зарим муж хэрэгжүүлж эхлээд байна.
Сургуулиуд яагаад ухаалаг гар утсыг хориглож байна вэ
Сургуулийн орчинд сурагчид цахим хүчирхийлэлд өртдөг. Гар утас, мессеж, тэр ч байтугай "номофоби" буюу утсаа “оролдохгүй” байх айдас нь сурагчдын анхаарлыг сарниулж, суралцахад сөргөөр нөлөөлдөг болохыг судалгаагаар тогтоосон. Анги танхимд утасны хэрэглээг таслан зогсоох нь сурагчдын хичээлд анхаарах, технологийн буруу хэрэглээг бууруулна гэж муж улсууд найдаж байна. Зарим бие даасан сургуулиуд ч утсыг хориглож байгаа аж. Саяхан Вашингтон ДС-ийн Жоржтаун сургуулийн тэргүүн “The Atlantic” сэтгүүлд сургууль утсыг хориглох цаг болсон гэжээ.
Сургууль дээр утсыг хориглох нь үр дүнтэй юу
Ангидаа утсаар ярихыг хориглосон нь сурагчдын хичээлдээ анхаарлаа төвлөрүүлэх, багаар ажиллах чадварыг сайжруулахад тусалсан гэж багш нар хэлж байна. Мөн зарим сургуулиуд утсыг хориглосноор дээрэлхэлтийг багасгасан болохыг тогтоожээ.
Өнгөрсөн жил Флорида мужийн сургуулиудад оюутнуудыг хичээлийн цагаар ухаалаг утас, чихэвч зэрэг хувийн утасгүй төхөөрөмж ашиглахыг хориглох хууль баталсан. Орландо дахь Оранж Каунти сургууль хичээлдээ байх хугацаандаа утсаа ашиглахыг хориглосон. Флоридагийн арга хэмжээ нь мөн сургуулийн Wi-Fi-аар нийгмийн хэвлэл мэдээллийн платформ руу оюутнуудын нэвтрэх эрхийг хаасан бөгөөд сургуулиас олгосон төхөөрөмж дээр TikTok-ийг тусгайлан хориглодог байна.
Оюутнууд болон эцэг эхчүүд хоригийг хэрхэн хүлээж авч байна вэ
Хүүхдүүдтэйгээ чөлөөтэй мессеж бичиж, дуудлага хийдэг олон эцэг эхчүүд гар утсыг хориглохыг эсэргүүцдэг. Эцэг эхчүүдийн 70 хувь нь сурагчдын дунд гар утас хэрэглэхийг хичээлийн үеэр хориглох ёстой гэдэгтэй санал нийлж байгаа ч тэдний талаас илүү хувь нь үдийн цай, завсарлага гэх мэтээр “заримдаа” утсаа ашиглахыг зөвшөөрч байх ёстой гэж үзэж байгаа нь судалгаанаас харагдаж байна.
