Хуурамч мэдээлэлтэй тэмцэх “Баримт нэн тэргүүнд” үндэсний сүлжээний олон нийтийн төлөөх сэтгүүл зүйн бүтээлийн уралдааны шилдэг оролцогчид өнөөдөр /2024.11.24/тодорлоо.
Энэхүү уралдааны гол зорилго нь нийгэм, олон нийт баримтаар баталгаажаагүй хуурамч мэдээ түгээх нь ямар хор уршигт хүргэдэг, цаашлаад хуурамч мэдээллийн талаарх олон нийтийн мэдлэг ойлголтыг сайжруулахад чиглэсэн байна.
"Баримт нэн тэргүүнд" сэтгүүл зүйн бүтээлийн уралдаанд нийт 9 редакцаас эдийн засаг, улс төр, эрүүл мэндийн салбарт хамгийн их тархдаг хуурамч мэдээллийн талаар бүтээл илгээж, өрсөлдсөн байна.
Бүтээлийн уралдааны нийт шагналын сан 12 сая төгрөг бөгөөд энэхүү уралдааны бүтээлүүд нь хуурамч мэдээллийн талаарх олон нийтийн ойлголтыг нэмэгдүүлэхэд үнэ цэнтэй, баримтыг нягталж, баримтын нэн тэргүүнд гэдгийг илүү тодотгосон учраас ийнхүү урамшуулж байгаа аж.
“Баримт нэн тэргүүнд” сүлжээний нэрэмжит, хуурамч мэдээллийн эсрэг энэхүү уралдаан нь энэ жил анх удаа зохион байгуулагдаж байгаа ба цаашид жил бүр уламжлал болгон Монголын баримт шалгах төв болон Сэтгүүл зүйн Инновац, Хөгжлийн үүр төв зохион байгуулахаар төлөвлөж байгаа ажээ.
“Баримт нэн тэргүүнд” үндэсний сүлжээ нь Сэтгүүл зүйн Инновац, Хөгжлийн Үүр төв, Монголын баримт шалгах төвийн санаачилгатайгаар 2023 онд сонгуулийн үеэр тархдаг улс төрийн хуурамч мэдээлэлтэй тэмцэх зорилготойгоор байгуулагдсан. Сүлжээний гишүүн байгууллагуудын хувьд хуулийн фирм, хэвлэл мэдээлэл, мэдээллийн суурь боловсролыг дээшлүүлэх, хэвлэлийн эрх чөлөөг хангах зорилго бүхий иргэний нийгмийн байгууллагууд, орон нутагт болон нийслэлд үйл ажиллагаа явуулж буй сэтгүүл зүйн редакцуудаас бүрдсэн нийт 19 байгууллагатай.
