Үндэсний аюулгүй байдлын зөвлөлийн Нарийн бичгийн дарга Ж.Энхбаяр УИХ-ын сонгуульд нэр дэвшихээр ажлаа өгөхөөр болжээ.

Сонгуульд нэр дэвших төрийн албан хаагчид нэгдүгээр сарын 1-ээс өмнө ажлаа өгөх хуультай. Тиймээс нэр дэвшихээр горилж байгаа хүмүүс ажлаа өгч эхлээд байгаа юм.

ҮАБЗ-ийн Нарийн бичгийн дарга Ж.Энхбаярыг Сэлэнгэ аймагт нэр дэвшинэ гэсэн мэдээлэл гараад байсан юм. Тэгвэл тэрээр өнөөдөр ажлаас чөлөөлөгдөх хүсэлтээ албан ёсоор өгөх аж. Энэ талаар өөрөөс нь тодруулахад "Өнөөдөр өргөдлөө өгнө. Нэр дэвших, эсэхийг нам шийднэ" гэсэн юм. Гэхдээ тэрээр ҮАБЗ-ийн Нарийн бичгийн даргын ажлаа өгсөн ч Ерөнхийлөгчийн Аюулгүй байдал, улс төрийн зөвлөхөөр томилогдох аж. Тэрээр Ерөнхийлөгч У.Хүрэлсүхийг сонгогдсоны дараа ҮАБЗ-ийн Нарийн бичгийн даргаар томилогдон ажиллаж байгаа билээ.

Жадамба овогтой Энхбаяр нь 1973 онд Улаанбаатар хотод төрсөн. 1990 онд Нийслэлийн 10 жилийн 1 дүгээр дунд сургууль, 1991 онд Цэргийн нэгдсэн дээд сургууль, 1999 онд Монгол Улсын их сургуулийг Эрх зүйч мэргэжлээр төгсөж, 2005 онд Нидерландын Хаант Улсын Маастрихтын их сургуульд Бизнесийн удирдлагын магистрын зэрэг хамгаалсан. Англи, орос хэлтэй.

• 1992-2000 онд “Нэхий” ХХК, “Сүлжмэл” ХХК-ийн Төлөөлөн удирдах зөвлөлийн дарга, “Газар” ХХК-ийн захирал,
• 2000-2002 онд Нефть, онцгой албан татварын гаалийн газрын дарга,
• 2002-2004 онд Улаанбаатар хотын гаалийн газрын Хяналт шалгалтын хэлтсийн дарга, дэд дарга,
• 2004-2006 онд Гаалийн ерөнхий газарт зөвлөх,
• 2006-2008 онд Улсын Мэргэжлийн хяналтын газрын дэд дарга, Тамгын газрын дарга,
• 2008-2012 онд Монгол Улсын Их Хурлын гишүүн,
• 2012 онд Монгол Улсын Засгийн газрын гишүүн, Батлан хамгаалахын сайд,
• 2012-2016 онд Монгол Улсын Их Хурлын гишүүн,
• 2014-2016 онд Монгол Улсын Их Хурлын Аюулгүй байдал, гадаад бодлогын байнгын хорооны дарга,
• 2016-2017 онд Монгол Улсын Их Хурлын Аюулгүй байдал, гадаад бодлогын байнгын хорооны дарга,
• 2016-2020 онд Монгол Улсын Их Хурлын гишүүн,
• 2020-2021 онд Монгол Улсын Ерөнхий сайдын Ажлын албаны дарга, ахлах зөвлөхөөр тус тус ажилласан.

Дашрамд дурдахад, сонгуулийн дараа ЕТГ-ын дарга Я.Содбаатарыг МАН-ын Ерөнхий нарийн бичгийн дарга болно гэсэн мэдээлэл улс төрийн хүрээнд гараад байгаа билээ.