Монгол Улсын Ерөнхийлөгчийн урилгаар Бүгд Найрамдах Польш Улсын Ерөнхийлөгч Анджей Дуда ирэх долоо хоногт Монгол Улсад төрийн айлчлал хийнэ.

Польш Улсын Ерөнхийлөгч Анджей Дуда гэргий Агата Корнхаузер-Дудагийн хамт Монгол Улсад 2023 оны дөрөвдүгээр сарын 24-26-ны өдрүүдэд төрийн айлчлал хийх юм. А.Дуда Бүгд Найрамдах Польш Улсын Ерөнхийлөгчөөр 2015 сонгогдсон бөгөөд 2020 онд болсон Ерөнхийлөгчийн сонгуулиар дахин сонгогдсон. 1990 оноос хойш БНПУ-аас хамгийн сүүлд буюу 2013 онд Ерөнхийлөгч Бронислав Коморовски Монгол Улсад айлчилсан юм.

Айлчлалтай холбогдуулан Бүгд Найрамдах Польш Улсын талаарх онцлох баримтуудыг хүргэж байна.

1.    Польшийн төрт улсын түүх X зууны үеэс эхлэлтэй гэж үздэг.

2.    37 сая 890 гаруй мянган хүн амтай. Нийслэл Варшав хотод 1 сая 800 орчим мянган хүн оршин суудаг. Үндсэн шашин нь Ромын католик.

3.    Нутаг дэвсгэрийн хэмжээ 312, 679 км2. ОХУ, Литва, Беларусь, Украин, Словак, Чех, Герман Улстай хиллэдэг.

4.    Парламентын засаглалтай. Сейм, Сенат гэсэн хоёр  танхимтай бөгөөд Сейм нь 460, Сенат нь 100 гишүүнтэй. Гишүүд дөрвөн жилийн хугацаагаар сонгогддог. Ерөнхийлөгч Анджей Дуда 2020 онд таван жилийн хугацаагаар дахин сонгогдсон. 

 5.    Үндэсний баяр нь Үндсэн хуулийн өдөр /5 дугаар сарын 3/, Тусгаар тогтнолын өдөр /11 дүгээр сарын 11/.

 6.    Дотоодын нийт бүтээгдэхүүн 2022 оны байдлаар 674.15 тэрбум ам. доллар. Нэг хүнд ногдох Дотоодын нийт бүтээгдэхүүний хэмжээ 18,221.63 ам.доллар.

 7.    Эдийн засгийн гол салбар нь аж үйлдвэрлэл, үйлчилгээ, хөдөө аж ахуй, металлурги, уул уурхай.

 8.    Байгалийн баялаг: Нүүрс, хүрэн нүүрс, байгалийн хий, хүхэр, калийн давс, асбест, төмөр, мөнгө, никель хүдэр, алт, зэс, цайр, занарын хийн баялаг нөөцтэй.

 9.    Мөнгөний ханш: Польш злот. 1 евро = 4.70 злот. 1 ам.доллар = 4.39 злот

 10. БНПУ 1999 онд НАТО, 2004 онд Европын Холбоо, 2007 онд Шенгений гэрээнд гишүүнээр элссэн.