Монгол Улсын Ерөнхийлөгч У.Хүрэлсүх НҮБ-ын Ерөнхий Ассамблейн 81 дүгээр чуулганы Ерөнхий санал шүүмжлэлд Ерөнхий сайдын хувиар хоёр, Ерөнхийлөгчийн хувиар зургаа дахь удаагаа оролцож, үг хэллээ.

Ерөнхий санал шүүмжлэл 2026 оны есдүгээр сарын 22-28-нд Нью-Йорк хотноо болсон бөгөөд Ерөнхийлөгчийг НҮБ-ын төв байранд Ерөнхий нарийн бичгийн дарга Антонио Гутерреш угтан авсан. Энэ жилийн чуулган “Итгэлцлийг сэргээж, шилжилтийг удирдан, бүгдэд хүртээмжтэй НҮБ-ыг цогцлоох” сэдвийн дор зохион байгуулагдсан юм.

Энэ жил Монгол Улс НҮБ-ын гишүүн орноор элссэний 65 жилийн ой тохиож байгаагаас гадна У.Хүрэлсүх Ерөнхийлөгчийн оролцож буй сүүлийн чуулган гэдгээрээ онцлог. Түүнчлэн 81 дүгээр чуулганыг Бангладешийн Гадаад хэргийн сайд Халилур Рахман даргалж байгаа бөгөөд Монгол Улсын Байнгын төлөөлөгч Н.Анхбаяр чуулганы 20 орлогч даргын нэгээр сонгогдон ажилласан. Ерөнхийлөгч У.Хүрэлсүхийг НҮБ-ын индэр дээрээс үг хэлэх үед Н.Анхбаяр хурлыг даргалсан нь онцгой давхцал болов.

Чуулганы үеэр Ерөнхийлөгч У.Хүрэлсүх НҮБ-ын Ерөнхий нарийн бичгийн дарга Антонио Гутерреш, Люксембургийн Их Гүн V Гийом, Хаити Улсын Ерөнхий сайд Аликс Дидье Филс-Эме нартай уулзсан. Мөн олон улс орны төр, засгийн тэргүүнүүд Монгол Улсын Ерөнхийлөгчтэй уулзах, манай улсад айлчлах хүсэлт тавьдаг болсныг Гадаад харилцааны сайд Б.Батцэцэг онцолсон юм.