Узбекистаны Самарканд хотод болж буй 46 дахь ФИДЕ-гийн Шатрын олимпиад үргэлжилж байна. Энэ сарын 16-27-нд зохион байгуулж буй тус тэмцээнд Монгол Улс эрэгтэй, эмэгтэй багийн бүрэлдэхүүнээр оролцож байгаа юм. Тэмцээн нийт 11 өрөгтэй, Швейцарь системээр явагдаж байна.

Монголын эмэгтэй шигшээ баг эхний долоон өргийн дараах байдлаар 12 оноотойгоор долоодугаарт эрэмбэлэгдэж байна. Тус баг долоон тоглолтын зургаад нь хожиж, Энэтхэгийг багт  хожигдсон юм.

Монголын баг эхний өрөгт Палестиныг 4:0, хоёрдугаар өрөгт Молдавыг 3.5:0.5, гуравдугаар өрөгт Перуг 2.5:1.5-ээр тус тус хожсон. Харин дөрөвдүгээр өрөгт дэлхийн чансааны тэргүүлэгчдийн нэг Энэтхэгийн багтай тоглож, 1:3-аар хожигдсон. Энэ тоглолтын эхний хоёр ширээнд Б.Мөнгөнзул дэлхийн аварга Конеру Хампитай, Т.Мөнхзул Рамешбабу Вайшалитай тус тус тэнцжээ.

Үүний дараа Монголын эмэгтэй баг тавдугаар өрөгт Хорватыг 2.5:1.5, зургаадугаар өрөгт Ираныг 3:1-ээр хожсон бол долоодугаар өрөгт Францын багийг 2.5:1.5-аар буулган авсан. Францын эсрэг тоглолтод Х.Баясгалан Софи Миллег хожиж, багийн ялалтад чухал оноо авчирсан билээ. Харин Б.Мөнгөнзул, Т.Мөнхзул, Б.Мөнгөнтуул нар тус тус тэнцжээ.