Bloomberg-ийн мэдээлснээр ОХУ-ын Уралс төрлийн түүхий нефтийн үнэ өнгөрсөн долоо хоногт баррель нь 116 ам.долларыг давж, 2013 оноос хойших хамгийн өндөр түвшинд хүрчээ. Дөрөвдүгээр сарын 2-нд Балтын тэнгисийн Приморск боомтоос ачигдсан Уралс нефть баррель нь 116.05 ам.доллараар зарагдсан бол Хар тэнгисийн Новороссийск боомтоос гарсан ачаа 114.45 ам.долларт хүрснийг эх сурвалж мэдээлжээ.

Энэ нь арванхоёрдугаар сард АНУ-ын хоригийн дарамтад орж баррель нь 40 ам.доллараас доош арилжаалагдаж байсан үетэй харьцуулахад ойролцоогоор 230 хувиар өссөн үзүүлэлт юм.

Дэлхийн нефтийн урсгалын тавны нэг нь дамжин өнгөрдөг Ормузын хоолой хаагдсанаас үүдэн үнийн огцом өсөлтийг хязгаарлах, нийлүүлэлтийг нэмэгдүүлэхээр улс орнууд яаравчлан арга хэмжээ авч байна.

Дэлхийн хоёр дахь том нефть экспортлогч Орос улс, ялангуяа Ойрх Дорнодоос ихээхэн хамааралтай Азийн орнуудын хувьд голлох альтернатив нийлүүлэгч болж гарч иржээ. Үүний зэрэгцээ АНУ Оросын түүхий нефть болон нефтийн бүтээгдэхүүнийг нийлүүлэх, борлуулахад түр хугацааны хоригийн чөлөөлөлт олгосон.

Алексей Третьяковын хэлснээр ОХУ дөрөвдүгээр сард газрын тос, байгалийн хийн орлогоос ойролцоогоор 1 их наяд рубль (12.7 тэрбум ам.доллар) төвлөрүүлэх боломжтой байгаа аж.