Улаанбурхан өвчин нь маш өндөр халдварлах чадвартай халдварт өвчин бөгөөд нэг халдвартай хүн дунджаар 12–18 хүнд халдвар тараах эрсдэлтэй юм. Дархлаа тогтоогүй бага насны хүүхдүүд өвчлөх нь элбэг бөгөөд уушгины хатгаа зэрэг хүндрэл үүсч, амь насаа алдах харамсалтай тохиолдлууд бүртгэгдсээр байна.

Эрүүл мэндийн байгууллагуудын зүгээс нийт хүн амын 95-аас дээш хувь нь дархлаатай болсноор сүргийн дархлаажуулалт хангагдаж, хүүхдүүдийг хүндрэл, эндэгдлээс хамгаалах боломжтойг онцолж байна.

2026 оны хоёрдугаар сарын 4-ний байдлаар улсын хэмжээнд улаанбурхан өвчний лабораториор батлагдсан нийт тохиолдол 14,075 болсон байна. Үүнээс 11,486 нь Улаанбаатар хотод, 2,577 нь орон нутагт, тав нь гадаад улсаас зөөвөрлөгдөн орж ирсэн тохиолдол аж. Шинээр илэрсэн 25 тохиолдлын найм нь нийслэлд, 17 нь орон нутагт бүртгэгджээ. Одоогоор 58 хүн эмнэлэгт хэвтэн эмчлүүлж байгаагаас 25 нь нийслэлд, 33 нь орон нутагт байна. Мөн Халдварт өвчин судлалын үндэсний төвийн Эрчимт эмчилгээний тасагт улаанбурханаар өвчилсөн 6 сартай нэг хүүхэд хүнд оноштойгоор эмчлүүлж байна.

Насны бүлгээр авч үзвэл өвчлөл 10–14 насныханд хамгийн өндөр буюу 5192 тохиолдол бүртгэгдсэн бол 0–4 насны хүүхдүүдийн дунд 3349 тохиолдол илэрчээ. Нийт батлагдсан тохиолдлын 70 хувийг вакцины бүрэн тунд хамрагдаагүй эсвэл огт вакцинд хамрагдаагүй хүүхдүүд эзэлж байгаа юм.