Монгол Улсын Ерөнхий сайд Г.Занданшатар томуу, томуу төст өвчний тархалтын нөхцөл байдал, мөн Ерөнхий боловсролын сургуулийн сурагчдын амралтын хугацааг наашлуулах эсэх талаар Эрүүл мэндийн болон Боловсролын яамны удирдлагуудтай уулзлаа.

Эрүүл мэндийн яамнаас улсын хэмжээнд хийсэн эрсдэлийн үнэлгээг танилцуулахад арванхоёрдугаар сарын 15 гэхэд томуу, томуу төст өвчин дэгдэх “өндөр эрсдэлтэй” гэж дүгнэсэн байна. Иймээс бага ангийн сурагчдын амралтыг 14 хоногоор наашлуулах эсвэл хичээлийг түр хугацаанд цахим хэлбэрт шилжүүлэх саналыг тус яам гаргажээ.

Тэгвэл Боловсролын яам тухайн саналыг шууд хүлээн авах боломжгүй гэдгээ мэдэгдсэн байна. Учир нь арванхоёрдугаар сарын 01-нээс эхлэн амраах тохиолдолд амралт ид хүйтний үед дуусч, хичээл эхлэх үед өвчлөл дахин дэгдэх эрсдэлтэйг П.Наранбаяр сайд онцолжээ. Хэрэв өвчлөл хичээл эхлэх үеэр нэмэгдвэл яах вэ гэсэн асуултад Эрүүл мэндийн яам баталгаатай хариу өгөх боломжгүй байгаагаа хэлсэн байна.

Талуудын байр суурийг сонссоны дараа Ерөнхий сайд эхний ээлжид халдвар хамгааллын дэглэмийг бүх шатанд чангатгаж, энэ долоо хоногт урьдчилан сэргийлэх ажлыг эрчимжүүлэхийг даалгав. Хэрэв өвчлөл буурвал хичээлийг товлосон хугацаанд амрааж, харин буурахгүй нэмэгдэх хандлагатай байвал ирэх долоо хоногоос сургалтыг цахим хэлбэрт шилжүүлэх чиглэл өгөв. Цахимд шилжсэн тохиолдолд сургалтын үйл ажиллагааг тасалдалгүй, чанартай зохион байгуулахыг Боловсролын байгууллагуудад санууллаа.

Мөн ханиад томууны улмаас хичээлдээ ирж чадахгүй байгаа хүүхдүүдийн сургалтыг цахимаар үргэлжлүүлэх боломжоор хангах шаардлагатайг онцлов. Цахим сургалтад хамрагдах нөхцөлийг сайжруулах үүднээс үүрэн холбооны оператор компаниудтай хамтран ажиллаж, интернетийн хүртээмжийг сайжруулах чиглэлийг ЦХИХХЯ-нд өгсөн байна.

Ерөнхий сайд цаашлаад иргэдийг бухимдуулахгүй, эмнэлгийн ачааллыг яаралтай бууруулах шаардлагатайг тэмдэглэж, зөвлөгөө өгөх нээлттэй утас ажиллуулах, цахимаар цаг авах боломжийг өргөтгөх, хүүхдээ үзүүлэхээр олон цагаар дугаарлаж буй байдлыг арилгах, шаардлагатай тохиолдолд нэмэлт үзлэгийн төв нээх зэрэг зохион байгуулалтын ажлыг шуурхай хэрэгжүүлэхийг ЭМЯ-нд онцгойлон үүрэг болголоо.